Plizyè jèn militan ekolojis ki fè pati òganizasyon Tab Konsètasyon Sodo (TKS) te pran lari nan jou posesyon fèt Sodo ki te 15 jiyè an, nan objektif pou mande otorite nan leta yo voye je sou anviwonnman peyi an k ap fin deperi, sitou lakay yo, nan vil Sodo.
“Lavi menase san Sodo. Dlo Sodo ap privatize. Dlo Sodo ap sedwi”, se sa Mike Cleever Cherry, yon manifestan fè konnen pandan l ap raple te gen 18 sous nan Kay Ara (Gwo lakou mistik kote Sous Kaskad soti), kounya rete 10. “Si nou pa leve kanpe pou n fòse leta sa, pratikman n ap pèdi Sodo”, li te rapousib pou l di.
Sou pankat yo nou te ka li: ‘’Lavi menase, leve kanpe’’. ‘’Yon ayisyen 1000 pye bwa’’. ‘’Ministè anviwonman mouri’’, ‘’Sispann boule do mòn Dokale’’, ‘’Planèt lan ap chofe, kapitalis pa enkyete’’, ‘’Dlo pa dwe privatize’’, “Rebwaze Mòn Dokale’’, ‘’Vyèj Mirak kase kou moun k ap detwi dlo Sodo’’.
Yon 2zyèm mach pou lavi
Militan yo denonse lefèt sous Dlo yo ap fin seche, dlo tounen liks, peyi an deja pèdi twòp sous, nap freyatik nou yo fin seche… Tab la kontinye plede anfavè rebwazman, itilizasyon enèji renouvlab yo, pwoteksyon sous dlo yo ak anviwònman an an jeneral…
Deja 20 mas pase an, militan TKS yo te pran lari an, nan lide pou pran posizyon parapòt ak degradasyon anviwonman epi dlo k ap seche toupatou. “Nou te gentan pran lari pou n di, privatizasyon dlo Sodo an se yon krim li ye. Menm bagay pou privatizasyon dlo sou planèt lan. Se ak vini systèm kapitalis lan ki pral fè dlo tounen bagay prive”, se deklarasyon sa Jean Guerdy, yon lòt manifestan, te fè.
Dlo pa dwe privatize !
Manifestan yo pwomèt pou yo pa kanpe la, kidonk ale jiskobou nan kad revandikasyon y ap mennen pou yon lòt kalte sosyete kote moun viv alèzteman. Mayo koulè vèt sou yo ki make ‘’Ann pwoteje anviwonman’’, yo te plizyè jèn gason kite pran lari an pou fè tande vwa yo ak pankat nan men yo.
“Jodi an yo di n fò k nou achte dlo. Se yon bagay ki pa fè sans. Fòk nou tounen [nan epòk], kote n kapab gen dlo ki sen, kote moun ka sèvi ak yo, jan yo vle”, Jean Guerdy te fini pou l di. Tab Konsètasyon Sodo (TKS) ki organize mach sila, son gwoupman pwogresis, batayè epi revolisyonè. Anviwon yon douzèn militant gwoupman sa te nan lari an.